Жаңалықтар

Петропавл зауыты алғашқы термос-вагондарды Ресейге жөнелтті

20.08.2019

Петропавл ауыр машина жасау зауытында әзірленген  термос-вагондардың алғашқы легі экспортталды. Жергілікті кәсіпорын тез бүлінетін өнімдерді еш ысырапсыз тасымалдайтын озық жобаны қысқа мерзім ішінде іске асырды.

Жаңа жабдықтың ерекшелігі көп. Ең бастысы, тасымалданатын азық-түлік, жеміс-жидек өнімдері бірқалыпты температурада ұзақ сақталады. «Петропавл машина ауыр машина жасау зауыты» АҚ бас директоры Вадим Шақшақбаевтың айтуынша, вагондар барлық сараптау комиссияларының сынағынан өткен. Оның ішінде Мәскеудегі темір жол көлігі кеңесі оң бағаларын беріп, Кеден одағының тиісті сертификаты алынған.

Кәсіпорын айына 50-ге жуық термос-вагон жасап шығаруға қауқарлы.
- Мұндай вагондар жоғары сұранысқа ие. Өйткені, жалпы нарықта азық-түлік тасымалдау жайы қиындап барады. Сөйтіп Қазақстанның транзиттік және экспорттық әлеуеті артатын болады. Отандық өндірушілердің күрделі жобаларды игерудегі қадамдары қуантады, - дейді «Атамекен» ұлттық кәсіпкерлер палатасы басқарма төрағасының орынбасары Евгений Больерт.

Келешекте зауыт жаңа құрылғылармен толықтырылып, ай сайын 100-ден аса заманауи вагон жасау көзделіп отыр.